ប៉ៃលិន៖ អភិបាលខេត្តប៉ៃលិន លោកស្រី បាន ស្រីមុំ បានផ្តួចផ្តើមបង្កើត «ផ្ទះបរិច្ចាគ» ទុកនៅមុខសាលាខេត្ត ដើម្បីទទួល និងផ្តល់សម្ភារៈ គ្រឿងឧបភោគ បរិភោគ ដល់ទុរគតជន និងប្រជាពលរដ្ឋមានជីវភាពខ្វះខាត។

អភិបាលខេត្តប៉ៃលិន បានប្រាប់ថា ពលរដ្ឋមានជីវភាពខ្វះខាត អាចមកយកសម្ភារប្រើប្រាស់ ឬគ្រឿងឧបភោគបរិភោគក្នុងផ្ទះបរិច្ចាគនេះបាន ដោយក្នុង ១គ្រួសារ ទទួលបាន ១កញ្ចប់។ ទន្ទឹមនេះ សប្បុរសជន អាចយកជាសម្ភារប្រើប្រាស់ ឬគ្រឿងឧបភោគបរិភោគយកមកដាក់ចូលរួមក្នុងផ្ទះបរិច្ចាគនេះបានផងដែរ។

ម្ចាស់គណនីហ្វេសប៊ុកឈ្មោះ San Vuth បានបង្ហោះខ្លឹមសារ អមជាមួយរូបភាព ៤សន្លឹកថា កូនទាំងពីរបានបោកសំអាតកាបូបដែលធ្លាប់ដាក់សម្ភារសិក្សាដើម្បីបរិច្ចាគដល់កុមារដែលត្រូវការ ទោះមិនមែនទិញថ្មី តែនៅប្រើបាន សភាពល្អ។

ម្ចាស់គណនីហ្វេសប៊ុកដដែលបានសរសេរដូច្នេះថា៖ «បងប្អូនអាចមកបរិច្ចាគសំភារៈដែលបងប្អូនប្រើរូចសម្រាប់អ្នកដែលមានជីវភាពខ្វះខាតជាងយើងនៅទីនេះបាន ទីតាំងជាប់របងសាលាខេត្តប៉ៃលិន។ ប៉ៃលិនខេត្តតូច តែបេះដូងធំ រួមគ្នាចែករំលែកអំពើល្អ»។

អ្នកលេងបណ្តាញសង្គមម្នាក់ទៀត បានស្នើឱ្យមានការបង្កើតផ្ទះបរិច្ចាគនេះឱ្យបានគ្រប់បណ្តាខេត្តដើម្បីជួយដល់ជនទីទល់ក្រ និងជនអនាថា៕